ماتوا فى عز شبابهم

بسم الله والصلاة والسلام على رسول الله اما بعد
ترددت كثيرا قبل كتابة هذا الموضوع
لكن الموضوع عمال يلح عليه ان اكتبه يمكن لانهم معظمهم ماتوا صغيرين ملهومش
ولد يدعيلهم فاكيد هما محتاجين دعائكم
وغير كدة هيكون عظة وعبرة لينا واولكم انا ان الموت يأتى بغتة
وايضا لانى تذكرت حديث الرسول عليه افضل الصلاة والسلام اكثروا من ذكر هادم اللذات
فاتمنى ان تتفاعلوا معى ولو بالدعاء بالرحمة ليهم والصبر لاهلهم
واللى تعرف حد مات وهو شاب تكتب هنا

القصة الاولى[ندعوك للتسجيل في المنتدى أو التعريف بنفسك لمعاينة هذا الرابط]صافى الله يرحمها)
كنت اعرفها واحنا
اطفال كانت بنت حيوية جدا ورقيقة وجميلة وكانت لها شخصية قوية كانت دائما
هى القائدة فى اللعب رحمها الله ثم سافروا الى السعودية تقريبا فى اعدادى
ورجعت وهى فى ثانوى لكن وجدتها متغيرة تماما فكان وشها منتفخ وطلعت مريضة
بالقلب
مكنش ليا علاقة
بيها ايامها بس كنت بسمع اخبارها دخلت الجامعة وتزوجت وحملت لكن للاسف لم
يتحمل قلبها وجلها نزيف ونقلوها بسرعة اهلها الى مستشفى فى القاهرة احنا من
الشرقية لكنها للاسف ماتت فى الطريق ماتت وهى عندها تقريبا عشرين سنة ربنا
يرحمها

القصة الثانية (محمود الترذى)
كان ولد اسمه محمود كان عنده 20 سنة وكان بيشتغل عند الترذى اللى بفصل عنده
كان الله يرحمه بشوش جدا وكل حاجة
واخدها ضحك وهزار عمرى ماشفته زعلان ابدا على طول كان مبتسم وبيضحك كان
يحسس الواحد دائما ان مفيش مشاكل فى الدنيا
كان يأخذ الامور ببساطة وفى مرة كان
رايح يشترى طلبات للمحل وكان واخد ولد صغير وراه على العجله وجه حظهم انهم
مشيوا جانب ميكروباص فسبحان الله يشاء العليم القدير ان شبكة الميكروباص
تقع على راسة ويموت فى الحال والولد اللى معه يتصاب
سبحان الله فالموت لا يعرف صغير ولا كبير
القصة الثالثة (ايمان رحمها الله)
هى كانت صديقة صحبتى بس انا شوفتها اكثر من مرة الله يرحمها
على ما اتذكر كانت وقعت على رجلها او
حاجة زى دية المهم انها مفروض مكانتش تتجبس لكن الدكتور جبسلها رجلها
وحصلها ماية تحت الجلد وجسمها كله كان منفوخ وتعالجت كتير بس معظم العلاج
كان غلط وكانت يعينى بتمشى بالعافية كانت اشبة بالقعيدة وسبحان الله ربنا
اراد لها الشفاء وبدأت تنزل الجامعة والمرة الوحيدة اللى شربت من كفاتريا
الجامعة يطلع الكوب ملوث وتصاب على ما اتذكر بالكبد الوبائى وتتوفى رحمها
الله

القصة الرابعة (احمد رحمه الله)
احمد الله يرحمه كان ابن صاحبة ماما وكان فى الجيش وكان محترم جدا الله يرحمه
كان اخد اجازة من الجيش كام يوم ولما
خلصت الاجازة كان مفروض يرجع وحدته وركب القطر ومفروض ينزل من القطر فى
مكان مفيهوش محطة عشان يركب موصله للوحده بتاعته
بيبص شاف المواصلة على الناحية
التانية ولانه عايز يلحقها مبصش فى قطر جاى ولا لأ(ساعة القضى بيعمى البصر)
فبينزل من القطر خبطة القطر التانى ومات ربنا يرحمه ويصبر اهله لحسن مامته
الى الان حالتها صعبة بالرغم انه فات حوالى6 سنين على هذه الحادثة

القصة الخامسة_(الصيدلى ووالدته رحمهما الله)
انا معرفهمش شخصيا ولكن سمعت عنهم
الله يرحمهم هو كان صيدلى هنا فى السعودية وكان معه ثلاث اولاد وكانت زوجته
حامل وجاب امه زياره للحج كان هو بيروح ويجى لانه شغال فى مكان بالقرب من
مكه ومامته هى اللى كانت مستقرة مع فوج فى مكة وكان هو شغال فى صيدليه
بيشتغل فى اليوم 12 ساعة فطبعا كان مرهق وراح عشان يجيب امه بعد انهاء الحج
فغفى وعمل حادثة ومات هو ووالدته وزوجته كان هنا فى السعودية استنت لغاية
مولدت عشان تنتهى العدة ونزلت مصر بس للاسف كانت فى حالة نفسية سيئة جدا
مهتمتش بطفلتها فتوفت الطفلة ايضا
القصة السادسة(غادة الله يرحمها)
كانت بنت طيبة وكانت مخطوبة وكانت هى
وخطيبها بيحبوا بعض وفجأة اكتشفت انها مريضة بالسرطان فعرضت على خطيبها
انه يأخد الشبكة لكنه رفض وتزوجها وكانت بتتعالج والدكتور كان محرج عليها
الخلفة
لكن تريقة حماها عليها فى الريحة
والجية ومعايرتها بعدم الخلفة جعلها تصر انها تحمل مهما ان كانت العواقب
وقدر الله وحملت وخلفت بس طبعا سائت حالتها جدا وتوفت تقريبا بعد سنة او
سنتين من الخلفة
وزوجها طبعا اعطى الولد لوالدتها تربية وتزوج

القصة السابعة(صديقة صاحبتى)
كانت بنت طيبة انا شوفت مامتها انسانة محترمة وصابرة جدا المهم الحكاية
انها زى اى بنت اتخطبت وتزوجت وحملت
بس للاسف جالها تسمم حمل واصبحت حالتها حرجة لدرجة ان الممرضات ربنا يبارك
فيهم كانوا بيبكوا عليها ويقرأوا لها القرآن وماتت رحمها الله
سبحان الله شوفت صورتها وهى بفستان الفرح وكانت مليئة بالحيوية رحمها الله

القصة الثامنة (معالى رحمها الله)
كانت فى اعدادى وكانت بنت طيبة جدا
وكانت خارجة من المدرسة وطبعا كانت الدنيا زحمة وكان فيه عربية نقل وعلى ما
اتذكر ان العربية خبطتها من قدام فالناس صوتوا فالسواق افتكر انها ورى
العربية فداس عليها مرة اخرى وتوفت فى الحال رحمها الله
القصة التاسعة(السادات الله يرحمة)
كان طالب فى كلية الطب وكان انسان
خلوق جدا وكان كل الناس بتحبه وفى يوم من الايام راح يصيف مع صحابة ولكن
قدرة غرق فى البحر رحمه الله

القصة العاشرة(ماتت وهو يعاكسها)
كانت بنت جميلة وتقريبا فى ثانوى
وكانت رايحة الدرس وكان سواق عربية نصف نقل بيعاكسها وكانت العربية مفيهاش
فرامل فكانت كل ما البنت تحاول يهرب منها يمين يتحرك وراها تقوم الله
يرحمها تمشى شمال يروح ورها لغيطة مخبطة وماتت فى الحال وكانت حالة اهلها
صعبة جدا ربنا يرحمها ويصبر اهلها
موت سندس
سندس ديه بنت ابن عمى وكان عمرها 3سنوات ولان جدها ابو امها ميسور ماديا كان بيشيل المسدس تحت المخده
وفى يوم مرات ابن عمى كانت ريحة تنظف
لوالدها الشقة وكان معاها اولادها الثلاثة فكانوا بيلعبوا وانتوا عارفين
شقاوة الاطفال فخد ابنها المسدس من تحت المخدة وكان بيلعب مع اخواته فطلعت
طلقة اخترقت راس سندس رحمها الله وماتت فى الحال

موت اخو صديقة ماما
كان رحمه الله كان بيحب واحدة جارتة لمدة 6 سنوات وربنا اكرمهم وتزوجوا بعد هذا الحب الكبير
لكن سبحان الله الاعمار بيدى الله
كان بيشتغل فى كنتاكى وفى اول ايام العيد وهو راجع من شغله ركب تاكسى ووقع
التاكسى فى الترعة وكان رحمه الله لا يعرف العوم وتركه السواق وانقذ نفسه
فمات غريق بعد حوالى 3شهور من زواجه ممن احبها قلبه
ابن امل صحبيتى
انا على فكرة شفت امل فقط كام شهر
ورغم انها صغيرة فى السن لكن ابنها محمد كان فى العشرين من عمره وكانوا
اسرة ليس لها علاقة بالدين كانوا اغانى وسهر وما الى ذلك
ولكن فجأه ربنا هدى محمد وقال لمامته
انه لازم يحج وفعلا اكرمه الله بالحج وبعدها بشهور قليلة توفى وهو فى
غرفته بالسكته القلبية فكان سببا فى هدايه هذه الاسرة والحمد لله مات على
حسن الخاتمة
على فكرة انا عرفتها فى حلقات تحفيظ قرآن

عدد المساهمات : 2394 تاريخ التسجيل : 05/09/2010

لا حول ولا قوة الا بالله
بيقولوا ان ده من علامات الساعة الصغرى
ربنا يرحمهم ويصبر اهلهم

كل انسان علي وجه الارض له يومـــه

شكرا علي القصص

ربنا يرحمهم و يرزقنا حسن الخاتمه

ربنا يرحمهم ويصبر اهلهم

الله يرحمهم ويصبر اهلهم ويرحمنا ويجعل اخر كلامنا الشهادة

اللهم امين
شكرا على المرور

ربنا يحسن ختامتنا

اللهم ارحمه برحمتك الواسعة
اللهم اغفر للمسلمين والمسلمات والمؤمنين والمؤمنات الاحياء منهم والاموات